陳展鵬日前接受由許文軒主持的《StarTalk》訪問，談到重拾歌手夢兼推出新歌《零歲》，展鵬表示：「1998年有機會簽大公司出歌，當時做歌手嘅心態好強烈，但完全唔知做歌手需要咩，入錄音室見到恭碩良打鼓彈結他，我乜樂器都唔識，當你見到恭碩良嘅畫面，同自己實力原來距離咁大時，會覺得點追，重新評估自己，知道自己缺乏好多，而同期歌手出騷，有陳奕迅（Eason）、謝霆鋒，個個好有實力，每次到我上台，都會願主保佑，好大壓力，慢慢驚咗做歌手，唔敢再諗。」
談到新歌與監製舒文合作，展鵬說：「佢同我錄音，佢都好辛苦，佢好似教緊一個新人，因為我個人都有歷史，仲要放低演員身分唱歌，過程好迷惘，好似完全唔識唱歌，邊度唞氣，邊度用力都唔啱，令自己好迷失，所以要慢慢做功課同練歌，錄完我覺得對拍戲有幫助。」
