廖啟智安息禮|兒子吹口琴哀別智叔 文哲文信憶父子情 (18:05)

文章日期:2021年04月20日

【今日直擊】廖啟智(智叔)的大仔廖文哲和二仔廖文信,在安息禮上吹口琴送別父親。文哲在台上細訴和父親的點滴:「佢(智叔)係一個愛家人、好愛我嘅爸爸,佢對我嘅愛近乎溺愛程度,我剛升高小嗰陣,佢平時工作好忙,但一直會接送放學,我升高小時,我同佢講我想學自行放學,佢第一個反應係應承,但心裏係非常擔心,喺佢眼中我仲係小朋友,但佢應承我呢個請求,我好開心自己放學,但其實喺我自行放學期間,佢有幾次喺學校跟住我,跟我返屋企,確保我平安,呢件事佢之後同我講,佢好尊重我決定,同時亦好關心我,暗中保護我,佢畀我嘗試(自行放學)我好感恩。

跟住慢慢大個,同智叔關係其實唔係話特別好,因為佢性格係一個嚴守規律,同埋界線定得好清晰嘅人,而我本身好隨性,比較我行我素,我哋性格差異愈來愈大,我係有一段時間好驚同佢相處,我有好多行為,佢係非常不滿,但佢會尊重我所有決定,但同時可能有少少責怪我,喺心底裏我會覺得,其實佢唔鍾意我,我會有呢個錯覺,佢同我相處好唔開心。

大個之後,同佢關係唔係close,但佢心底好愛我,早幾年我去澳洲讀書,離開異地、離開父母,每次我放假返嚟,佢都會喺機場接我,每次見到佢第一眼,佢係打從心底裏笑出嚟,佢係非常掛住我,雖然性格不合,但嗰個笑容話我知,佢係幾咁掛住我,佢呢個笑容亦話我知,我返到嚟有屋企感覺,所以佢係一個非常愛我嘅爸爸。」

二仔廖文信則說:「我同爸爸都算幾friendly,喺屋企有時叫佢『智叔』,特別呢幾年我做production方面嘅嘢,呢樣係佢專長,畀好多意見我,我本身唔叻做編劇同幕前演出,每當我要做呢啲嘢,會問佢意見,我自己比較怕醜,作品唔夠膽拎畀人睇,唯獨係家人同埋佢,我放心畀佢哋睇,每次佢都畀好多寶貴意見。

年頭佢喺醫院,我搵咗啲勵志小故事,喺醫院讀畀佢聽,原意解悶及滋潤心靈,佢真係好鍾意教人,佢執我讀成點,尾音呀、抑揚頓挫唔夠、語速同語氣,結果成為我哋新活動,喺屋企冇,醫院獨有,每日都會講幾個故事,亦有一家人喺醫院圍讀劇本《相約星期二》,呢個係佢好鍾意嘅舞台劇,佢都曾經演出過。

裏面講述一個患有絕症教授,在生時候為自己搞一個喪禮,原因係覺得過身後先搞喪禮,佢啲朋友或親人嚟到,佢冇辦法再聽到,咁係一件好可惜嘅事,佢受呢件事啟發,叫我哋一家人每人同佢講,我哋最後想同佢講嘅嘢,所以我哋3個寫咗封信讀畀佢聽,媽媽亦搵咗好多朋友、同事、親人,錄啲說話畀佢聽,睇完後好多人惜佢好開心,佢依家返天家,冇機會再請教佢同問佢意見,但自己好感恩成為佢最後學生,成為一個令佢驕傲嘅學生同兒子。」

相關新聞:廖啟智安息禮|嘆老公辛苦命 陳敏兒憶往事 不捨智叔離開

相關新聞:廖啟智安息禮︱郭富城杜琪峯羅蘭送別智叔

相關新聞:廖啟智安息禮︱王祖藍蔣志光唱詩歌 田啟文稱陳敏兒堅強

(即時娛樂)