姜濤完騷嗌攰 小儀獲Edan派心自封「正印」 (20:18)

文章日期:2021年05月08日

MIRROR昨晚舉行第2場演唱會,12子繼續落力唱爆舞台。完成演出後,曾於綵排時暈倒的姜濤在社交平台上載與呂爵安(Edan)身在後台的片段,短片中的姜濤沒氣力地說了句︰「好攰呀﹗」身旁的Edan咬了一口香蕉補充體力,並說︰「Good騷蕉。」令姜濤「哈」一聲笑了出來。

曾跟Edan一同主持《考有Feel》的阮小儀昨晚也有捧MIRROR場,她一現身觀眾席已獲Edan一班粉絲送上卡通燈牌仔及「爵」字大燈牌,成為他們一分子。Edan雖然身在台上演出,但任何時候只要見到小儀舉機拍攝都識自動望鏡,更向小儀揮手和派心。完騷後,小儀入後台跟MIRROR合照,Edan站在她身邊作狀獻吻,難怪小儀會自封為Edan的「正印」。Edan的粉絲對小儀這個「正印」似乎非常受落,留言「正印萬歲」、「正印好幸福」、「多謝正印咁棒爵安場」。

小儀說︰「好開心呀!第二場Good show﹗好鍾意一班人好熱血去做好一件事,佢哋絕對做得到!MIRROR記得休息多啲呀,仲有4場呀!有得入場嘅記得而家keep聲呀,因為到時入場有排嗌呀呀呀!多謝爵屎們咁錫我!先收到Edan卡通燈牌仔,之後仲有埋爵字大燈牌!正呀!我都做到嘢,捉埋Edan一齊同燈牌影相!wakaka !」

(即時娛樂)