不忿被屈做小三 張惠雅反擊網民︰亂打幾句覺得好有道理 (20:33)

文章日期:2021年06月05日

32歲前HotCha成員張惠雅(Regen)自與台灣男友分手後,體重急跌至84磅,去年被蚊蟲和沙蝨所咬的右腳,更因為黑色素愈變愈黑而看起來滿佈黑斑,到診所求醫被一度誤會有吸毒習慣。Regen的右腳照片曝光後惹來網民負評,有人更重提當年她介入薛世恒與陳法拉婚姻的傳聞,甚至指HotCha是因為她才解散。

Regen不甘被抹黑,在社交平台撰寫千字文反擊。她在文中自認「EQ好差」及「個人本身癲癲哋」,會為不開心事在社交網「亂咁放負」。Regen說︰「每一次,每一次啲人都要屈我係小三,我真係介意。曾經對我傷害過嘅人,我都係唔會忘記佢哋。誣捏(衊)我放假新聞、迫我影假新聞相、迫我做拆散Hotcha嘅罪人,一條又一條嘅罪名放喺我背上,嗰啲背後捅我刀、嘲笑我,又同你好似好好朋友,依家嘅我都會學識斷捨離呢一啲對自己有害嘅人。我好記得有事嘅時候,重要嘅人一句嘅說話都冇幫過我,或者輕輕鬆鬆踩幾腳,畀我慢慢咁跌入谷底。」對於被誤會有吸毒習慣,Regen強調她「最毒嘅都係飲酒」。她說︰「酒精好多化學性合成物,唔靚嘅酒都可以好傷身體,吸毒都唔會淨係爛得對腳啦我估。」

Regen斥網民眼中只有攻擊和批判,指他們「坐喺度亂打幾句覺得自己好有道理」。Regen說︰「香港生活實在太攰,唞氣都覺得好困難嘅時候,畀多少少關心別人,但係你哋呢班人,係呀我癲癲哋呀,就係過往你哋所有嘅誣捏(衊),令到一個未做過小三嘅人、討厭小三嘅人,成為咗一個好似全世界公認嘅小三。淨係識得揸住一張相話咗我咁多年,咁叻嘅查個真相出嚟啦,查到真相邊一個當時屈我嘅,畀番啲獎勵金又得,要一啲酬勞又得,橫掂我畀人屈咗咁多年都好想搵到真相......唔好踩人哋嘅夢想,踐踏人哋建立嘅嘢,因為咁樣你永遠都係只係喺最低層,畀呢個世界慢慢侵蝕你,直到下一世再下一世再下一世。」

(即時娛樂)