太極紅館騷變身「90後」 雷有輝爆隊友Ricky出蠱惑 (16:22)

文章日期:2021年06月09日

太極樂隊將於8月7日至8日,假紅館舉行「太極RAINBOW AFTER RAIN演唱會」,日前隊友齊集為個唱開會,更討論新一輯廣告細節。廣告以動畫形式進行,眾人的容貌4秒後慢慢變老36年,屆時將成為真正的「90後」(90歲後)!

主音雷有輝大爆隊友Ricky「出蠱惑」,要求設計師幫手出術:「我哋每一個都變晒90歲嘅樣,淨係佢一個人揀張咁後生嘅相,睇落同依家都冇乜分別,可能佢都知自己擺唔耐,未必有90歲命啩?其實變老好容易,我哋做少幾次mask、唔化妝都可能有呢啲效果。」

Joey Tang表示被自己的年老樣嚇親,笑言有「趕客」成分:「初初諗邊個咁大整蠱?原來係由老變後生,咁都好啲,因為有比較,依家睇落仲靚仔咗好多!今次個騷好多Gary(唐奕聰)生前嘅好朋友都話想幫手,所以好多人嚟支持,呢一刻我哋仲未綵排,但都唔習慣冇咗佢,每一個細節都預佢一份。」

「Hi-Fi德」叫太極Fans積極撲飛,因為之後未知何時會再舉行個唱:「依家世界日日改變,呢個騷都因為病毒延期咗幾次,下次再聚都唔知幾時,可能要到30年後先有機會搞,到時我哋仲未死又行得郁,再唱畀大家聽囉!」

(即時娛樂)