ANSONBEAN狂操肌 戒甜戒煎炸美食 工作忙爆無暇追女仔 (17:16)

文章日期:2021年08月04日

寰亞新人陳毅燊(ANSONBEAN)首支跳舞單曲《CRUSH(oh no!)》,公司除落重本製作MV,加入不少CG畫面外,更為他舉行MV首播會。ANSONBEAN獲公司器重,「豆粉」(粉絲暱稱)同樣有福利,為了讓粉絲看清楚偶像精湛舞技,公司決定「加碼」拍攝《CRUSH(oh no!)》dance version特別版。

ANSONBEAN說:「因為新歌MV裏面有太多情節,公司想拍一個dance version,等大家睇清楚成隻舞。其實要跳成晚,唔係太辛苦,反而中間休息時間,我仲要攞條橡筋帶出嚟練肌肉,無非想畀人感覺大隻啲。」

他稱:「以前我一個星期做3日gym,依家會一星期操5、6日,另外我會去玩攀石、游水、打網球、滑浪,純粹想做多啲運動,好玩得嚟又大隻啲,想著背心嘅時候可以挺啲、橫啲。」當日MV在晚間拍攝,有工作人員請食pizza,但ANSONBEAN不為所動,整晚只不停飲水。「我唔食嘢唔係怕肥,係驚生暗瘡影響皮膚,所以要戒甜戒煎炸食物,以前我都鍾意食炸雞,可以一次過食3件,又鍾意食芝士蛋糕,但依家掂都唔敢掂」。

工作排山倒海,問ANSONBEAN是否無暇追女仔,他怕醜表示:「係…係呀!冇時間追女仔呀,不過我啲MV全部都已經係女友視角,所以我唔使追!」

(即時娛樂)