《2021香港小姐競選》準決賽昨（22日）晚完成，12強佳麗將於9月12日，在紅館決一高下爭后冠。昨晚眾佳麗在尾聲時，身穿七彩繽紛﹑鮮艷奪目的晚裝亮相，有網民發現她們身穿的該款晚裝，竟跟海洋公園水上樂園的全新「八彩天梯」撞色，毫無違和感；另外，身為大師兄的錢嘉樂，昨晚偕同黃庭鋒﹑丁子朗﹑周嘉洛和吳偉豪擔任司儀，錢嘉樂臨尾卻老貓燒鬚，將港姐決賽日子講錯做9月21日，丁子朗和吳偉豪即時輪流大嗌更正：「9月12號呀﹗」
此外，在泳裝問答環節，錢嘉樂跟4位小鮮肉講解規則，吳偉豪先入隔音箱，錢嘉樂鬧着玩問他：「聽唔聽到呀？吳偉豪，你仲有冇冲涼嗰陣時將個電話....」此時周嘉洛衝上來截停錢嘉樂並焦急問道：「大師兄，我哋依家做節目，啲問題係咪應該有底線？我哋係咪要尊重私穩？」錢嘉樂接着說：「我問佢冲涼時有冇打電話叫外賣食之嘛，你以為我問乜嘢呀？」而身在隔音箱的吳偉豪完全聽不到他們對話。
