32歲岑杏賢（Jennifer）今年5月宣布為圈外丈夫張嘉俊（Kelvin）佗B，近日盛傳她已「卸貨」，為老公一索得男。Jennifer接受無綫娛樂新聞台訪問，親口承認已分娩並榮升媽咪，B仔英文名Preston，重6磅10安士，B仔比預產期早了兩星期出世，母子平安。Jennifer表示和B仔已回家，她更指囝囝相當「大食」。
初為人母的Jennifer分享感受：「首先好多謝大家祝福，我同BB已回家，我同老公一聽到BB喊聲時，我哋都好感動，都忍唔住流淚，見到BB又好開心，感覺好奇妙，明明朝早喺我肚內，下晝就出世。第一眼見到BB，見到佢鼻頭，都幾似我同我老公，好多姑娘都覺得佢個樣似我，但仔細啲睇，嘴仔同雙眼皮都幾似爸爸，啲手指腳趾都好長，可能遺傳我同我先生嘅高度。」
Jennifer表示囝囝為食，「喺醫院時餵人奶，好成功，BB都肯食，好乖及聽話，過程順利，BB偏向大食，佢食嘅分量畀一般BB多少少，我覺得幸運，第4、5日已上到奶畀BB，所以覺得母愛好偉大，同埋責任心亦大好多，但所有嘢都值得」。
