相約薛家燕茶敘 余慕蓮死過翻生覺感恩:想玩多幾年先... (13:37)

文章日期:2021年09月21日

余慕蓮(魚毛)去年底因肺纖維化入院,驗出患血液炎,住院半年後,今年4月出院回家休養。今年7月魚毛84歲生日時,跟老友吳麗珠﹑李琳琳和龐愛蘭等飯敘慶祝。適逢中秋佳節,魚毛相約好友薛家燕﹑安德尊(大王)等飲茶。

《東張西望》播出魚毛和家燕姐及大王茶敘過節片段,家燕姐關心魚毛,魚毛則說:「我依家好彩喇,唔使坐輪椅,我剩係用呢個嘢(助行架)。」

家燕姐讚魚毛有生命力,魚毛再說:「我想玩多幾年先,我好感恩,啲人話我之前入ICU,10個入去9個都唔出得嚟,我肺纖(維化)嘛,依家幾個月要打一次標靶藥,一次幾千元。」

當大王現身跟魚毛姐見面時,戴了口罩的大王即表示要跟魚毛「惜啖先」,同場還有耳鼻喉專科醫生林建業,魚毛說:「佢(林醫生)好關心我,成日問候我,有時WhatsApp問候我,我又WhatsApp多謝佢。」林醫生讚魚毛為人親切,大家亦有緣分而變成老友。

訪問期間,魚毛胃口大增,大啖食乳鴿,不過期間她吃得稍急,突然咳了幾聲。魚毛表示能再吃東西感覺很正:「之前睇住人食嘢流口水,自己冇得食,樣樣唔食得,嗰時喺醫院,食嘅嘢要剪碎,飲水要加凝固劑,驚我濁親。」在旁的家燕姐說:「佢係根本食唔到嘢,佢係想喊,因為疫情,啲人又唔可以睇佢,後來可以慢慢食番嘢,可以吞嘢,佢自己練習,佢好肯去練,好積極人生,好樂觀。」

魚毛接着說:「我想做番正常嘅人﹗之前死過翻生,講唔到嘢,食唔到嘢,包尿片,瞓覺瞓到我背脊又爛,屁股又生瘡,幾辛苦,我以為會死,但死過翻生。」魚毛表示在家中不用助行架,她說:「希望連呢個架都不需用。」然後她示範不用助行架,見她行得都尚算幾好,而不少茶客亦上前慰問她,畫面溫暖﹗

(即時娛樂)