張慧儀早前出任「兒童心臟基金會籌款事務委員會聯席主席」，為呼喚大眾對病童的關注，將舉辦慈善運動日，更於10月16日起以「先天性心臟病童（「心童」）生命之旅」為主題的相展響頭炮，透過多個故事主角的人像攝影，由「懷孕」到「長大成人」，呈現心童成長經歷、心路歷程和內心矛盾。
相片透過互動相片展覽，與公眾分享心童故事，以了解他們人生旅途，當中展出張慧儀與愛兒Hanson相片，母子情深勁溫馨，「阿仔有少少怕醜，所以叫佢入行拍嘢就唔好搞，但呢次係慈善活動，我諗吓計仔𧨾佢亮相，其實可以母子檔做善事係好特別，平時冇乜機會咁影相」。
張慧儀榮升基金會主席，與囝囝齊做義工，可增進母子情，「其實囝囝做手術後，係奇蹟康復得好，我都想佢知道要感恩，為社會付出，有機會一齊做義工，呢啲係『身教』」。
受疫情影響，張慧儀坦言工作受影響，要深思熟慮才可接工作：「之前有人邀請我返內地拍劇，但來回隔離成個月，真係要諗掂阿仔邊個照顧呢？點知佢同我講『媽咪你放心去啦，我大個喇』，我當時呆一呆，望真啲佢真係成熟咗，依家先放膽接工作。」
