歌手陳明憙新歌《聲之靜》獲得電台流行榜冠軍，陳明憙坦言非常興奮，預告EP將大玩「音叉」元素，從旋律治療Fans：「呢首歌有『安眠』作用，令人放鬆心情，所以啲Fans每日起身都會聽一次，令佢哋Relax，又幫我掃高個瀏覽量，咁就雙贏局面。來年會推出唱片，每首歌會加啲音頻治療嘅音叉落去，首首歌有唔同作用，照顧大家情緒。」
雖然獲電台流行榜冠軍，但陳明憙無暇放鬆，要為拍攝工作做準備：「我都想去慶祝，但過兩日要參加Casting，呢一刻好緊張，完全唔敢放肆，唯有用音叉幫自己Relax同去水腫。」
成功考到音頻治療資格，陳明憙找「朋友」做白老鼠：「我試過搵狗仔去做治療，佢哋好乖坐定定聽我啲音叉發聲，不過貓貓就駕馭唔到，佢以為我嘅音叉係玩具，走嚟咬個音叉，真係冇辦法。」
陳明憙早前投身劇組，她笑指曾自薦做打女，但被導演一口拒絕：「其實我恨做打女，練咗泰拳都幾年時間，加上呢排都學詠春，諗住都係時候『出手』㗎喇，點知導演話我嘅角色完全唔使郁手，撲熄咗我嘅打女夢！」
