安俊豪、李妍與蘇家欣昨晚（5日）首次合體開騷，在海洋公園怡慶坊舉行慈善音樂會。李妍以《這世代》及《玫瑰有刺》打頭陣，與師兄安俊豪合唱《因為愛情》；蘇家欣分別獻唱王菲的《暗湧》與薛凱琪的《給十年後的我》等。
安俊豪演繹一連串快歌《卡關達人》、《Keyman》及柳應廷的《狂人日記》，全場high爆，現場頓成大型派對，全場企起身跳舞。音樂會尾聲，他們合唱逾10分鐘的串燒歌，把音樂會的氣氛推至高峰。
完騷後，安俊豪表示首度伙拍師妹演出音樂會，見到觀眾看得投入，十分感動。他透露有意明年舉行個人音樂會：「希望可以喺九展，因為我好鍾意現場演出，可以睇到觀眾嘅表情。」但他要跟媽媽說對不起，因為最近為了排練，很久沒有跟媽媽吃飯：「返到去要惜佢十啖先得。」
作為大師兄的他，大讚兩位師妹蘇家欣及李妍的表現。李妍表示開心可以參與其中：「我覺得同佢哋好有默契，雖然頭先有啲蝦碌，但係現場係咁㗎啦，我都盡咗力。」蘇家欣自爆開騷前一晚睡不着：「好擔心自己表現，但係喺台上感覺好實在。」
