林溥來11個月大囝囝爬行跣手傷下巴 入院縫6針 (20:10)

文章日期:2022年03月18日

《東張西望》主持林溥來(Patrick Sir)和老婆關宛珊育有B仔林若嘉(Preemo),下個月便滿1歲。Preemo日前在家戴了頭盔在木地板上爬行,卻突然跣手仆親撼傷下巴,當堂爆喊;關宛珊見狀焦急如焚,她先保持冷靜,幫B仔止血,再按傷口止了20分鐘左右,同時避開傷口,用冰敷附近位置,再消毒傷口,當時B仔已沒有喊,兼且笑住玩。

雖然當時已止血,但不肯定是否需要縫針,後來老公林溥來回家,他看到囝囝傷口甚大,認為要縫針,最後兩公婆徵詢過醫生意見後,決定帶囝囝到醫院處理,最後囝囝下巴被縫6針。

關宛珊寫道:「成個過程,Preemo比我哋想像中堅強、勇敢,真心覺得佢好叻!等攞藥嘅時候,仲好有閒情逸致撩我哋玩,到而家亦都一啖藥唔需要食~~冇諗過喺平滑嘅木地板撞親,都要聯針,仲聯成6針咁多~ 我哋一直都有預計,帶大一個男孩子,一定要面對佢整親手腳、聯針、甩骹之類嘅意外,但絕對冇諗過咁快就要經歷。」她還建議如許可的話,要幫BB買定保險。

Patrick Sir今天亦貼了B仔相片報平安:「好感恩大家咁錫洋蔥頭,紛紛留言鼓勵佢同安撫我哋,令我哋呢對新手父母感受到好多愛!洋蔥頭聯完針已經好好多,傻更更應該都唔知自己受咗傷,因為冇乜痛,唔需要食止痛藥,已經充滿活力同平時一樣無時停。我哋每日都幫佢洗傷口,期望佢下星期五拆線一切順利!再次多謝大家嘅關愛!Preemo同我講話佢會繼續(小心)玩,繼續探索,繼續學習,繼續發放笑彈喎。」

(即時娛樂)