陳嘉寶憶懷細女時 胎位不正感沮喪 母親節願小孩健康成長 (13:06)

文章日期:2022年05月04日

母親節將至,身為3女之母的陳嘉寶(Anjaylia)早前一家到北角玩滾軸溜冰預祝,非常盡興。這個母親節,Anjay將帶3個囡囡Hosanna、Eliana與Azaliah跟嫲嫲、婆婆三代同堂溫馨慶祝。

Anjay感恩媽媽與奶奶母愛的偉大,當天實行「媽媽大晒」慰勞母親大人。Anjay說:「今年母親節同3個囡囡一齊過,會有一日同我媽咪、一日同奶奶晚飯慶祝,訂咗花畀佢哋,佢哋都辛苦咗咁耐,當然係媽咪同奶奶大晒!」

Anjay讚丈夫黃頌祈(Epaphras)照顧家庭:「其實我好幸福,有乜嘢事老公真係落手落腳去做,畀足時間我休息,要照顧一大三細嗰個係我老公。我先生好努力工作,同時又照顧我哋,比起上一代,我哋已經好幸福,當然工作同家庭要取得平衡,有時喺屋企工作,因為小朋友喺度嘈,都會忟,不過我成日提醒自己,佢哋大得好快,所以好好珍惜佢哋搞破壞嘅時光。」

懷胎十月,母親經歷有甜也有苦,原來Anjay懷住Azaliah、臨盆在即的時候,曾遇到胎位不正,要住院近2星期,當時她憂心胎中的Azaliah,同時惦念家中兩個小寶貝,令她曾感沮喪,她說:「其實之前佗兩個女嘅時候好順利,冇嘔、冇抽筋呢啲狀况,到佗第三胎,起初都冇嘢,但係到第8個月時,發現有胎位不正情况,本身7、8個月嘅時候,BB個頭已經向下、係一個適合生產嘅位置,但係到8、9個月時,BB喺肚入面180度咁轉,個頭轉返上去不特止,BB打橫喺個肚度,醫生話有危險,因為一穿水,BB有可能踢到臍帶就會有生命危險,如果係咁就需要緊急開刀,所以醫生就建議即刻入院觀察,入到醫院醫生有兩個建議,一係人手轉胎位、一係就等到38周後開刀。」

Anjay續說:「正常來講肚入面唔會有咁多位可以轉,加上BB已經6磅幾差不多7磅,但係好神奇,佢可以每日都喺度轉,去到39周,本來都諗過要開刀,不過我最希望都係可以順產,當喺醫院同屋企兩個BB視像時,佢哋喺度喊,我哋都好掛住大家,真係好肉赤。

之後BB終於冇乜再轉,醫生就話時機成熟,幫我做人手轉頭,之後BB好乖冇再轉嚟轉去,我就返屋企待產,其間都擔心BB喺我平躺時有機會轉身,所以我用枕頭墊住,好似坐喺度咁瞓,最後過咗41周就順產,成個過程好擔心,但經歷過呢樣嘢後,母親節最大嘅願望,只係小朋友健康開心,咁已經係最大嘅禮物。」

服裝提供:Isabel Marant

場地提供:Bun’s 2020 Roller Skating Training Centre

(即時娛樂)

相關字詞﹕陳山聰 母親節