郭鋒因太太離世跌入情緒深淵 無法演戲淡出幕前 (14:05)

文章日期:2022年06月08日

資深演員郭鋒自太太歐陽珮珊2017年癌症病逝後淡出幕前,近日他接受「香港演藝人協會」訪問,提到太太離世後的心情時仍一度眼濕濕,揮揮手要求暫停拍攝。

郭鋒在訪問中透露本來與無綫仍有兩套部頭約,惟太太離世後,其情緒大受影響,投入不到拍攝工作。他說︰「個心情唔得,埋唔到位,因為思潮太犀利,所以多謝無綫,唔好意思。」郭鋒感謝身邊的親戚朋友非常關心他︰「其實有好多都係我太太啲學生,佢哋好關心我,知道我同太太嘅生活,大家嘅相對係點樣,好擔心我。初時我(情緒)真係跌咗落去...依家講起都有啲酸酸哋...」說到這裏,郭鋒強顏歡笑,眼濕濕地揮手要求暫停拍攝。

鏡頭一轉,郭鋒繼續說︰「其實一個人生命嘅價值,睇你點睇,一啲事業為重,一啲就姻緣、婚姻。我嘅家庭係我人生最大得着,亦好幸運。當然,人同人冇得比較,最緊要係滿足。我喺事業上得到我其中一種興趣,投入咗去嗰個世界,而喺嗰個世界裏面認識咗我太太,呢個係天意安排。」

(即時娛樂)

 

相關字詞﹕郭鋒 歐陽佩珊