Nowhere Boys音樂會主題曲登叱咤榜季軍 全隊邀Hansun帶小情人捧場 (12:09)

文章日期:2022年07月11日

樂隊Nowhere Boys的音樂會主題曲《路人歷險記》,派台即火速登上商台「903專業推介」季軍位置,為7月23日麥花臣場館舉行的「Nowhere Boys"Know Where to Go"音樂會2022」開騷打下強心針。

還有2星期開騷,Nowhere Boys近日密鑼緊鼓為音樂會綵排,5子齊集Band房練歌。主音Van說:「今次我哋將好多歌重新編曲,令Fans同我哋都有新體驗,3歲到80歲都會鍾意!」

低音結他手Hansun最近榮升爸爸,隊友們讚B女可愛,紛紛要求他帶埋「小情人」捧場。琴鍵手漁佬之前都有帶囝囝睇騷,他說:「小朋友嚟睇Band Show,係非常好『放電』活動,不過一定要記住幫小朋友戴耳機保護耳膜。」

Van說:「我見過有孕婦嚟睇我哋開騷,佢話係胎教。咁我哋嘅音樂會,做到零歲到100歲都可以睇,老少咸宜。」狂做運動成功減走10幾磅的Van,身形更弗,聲音更響亮,綵排時他充當唱歌老師,他一邊教唱「EE」發音開聲,隊友就搞笑回應「(依依)不捨」和「(姨姨)我不想努力了」,非常百厭,Van哭笑不得。

成軍7年,Nowhere Boys除了5子圍埋夾Band,近年嘗試其他歌手合作,2019年為鄭伊健度身訂做兼合唱《時光歲月》、去年為C AllStar《北極熊的遺言》編曲及聯乘Studio Live、為MIRROR正副隊長Lokman(楊樂文)和AK(江𤒹生)合唱歌《虎道門》炮製特別版,以及為AK歌曲《信之卷》作曲和編曲。

去年Nowhere Boys在九展Music Zone舉行3場音樂會,場場爆滿。今年7月移師更大場地,旺角麥花臣場館舉行,早前在TG開賣優先門票,反應熱烈。

(即時娛樂)