張敬軒日前獲邀出席一間中學的150周年校慶，並獻唱《遇見神》。軒仔甫出場，全校師生進入瘋狂狀態，現場歡呼聲大得幾乎聽不到軒仔歌聲，認真厲害。
演唱完畢後，幾位學生司儀向軒仔送花，原本打算回後台的軒仔被叫住，司儀說：「張敬軒先生，你睇吓群情洶湧呀，你唔係諗住淨係唱一首歌啩？係咪呀？」台下觀眾立即起哄，全場不停嗌encore，猶如重返紅館現場一樣，為了不讓同學仔失望，軒仔便說：「花我先唔收住，再送多一首歌畀大家，《櫻花樹下》。」最後更同全場觀眾自拍大合照。
事後軒仔表示起碼有3至4年沒有到學校演出，更笑說：「因為呢間係女校嘛，所以其實我咁大個仔，未試過畀咁多位女仔圍。同埋真係好耐冇做過學校騷，耐到我都唔記得，因為疫情至少都有3年，見到咁多年輕一輩，我都覺得自己個人青春咗、有活力咗，話晒我都係今年2022年度『哎呀新人』。」
之前紅館演唱會，軒仔encore到破紀錄，想不到今次學校騷，同樣被觀眾要求encore，軒仔笑言自己「做壞規矩」，「當然大家鍾意我嘅演出，我梗係開心，亦都一定盡量滿足大家要求，不過唔知會唔會做壞規矩？之後無論邊個場都要encore？咁就要睇現場觀眾，係咪真係想聽我唱多幾首啦」。
