林奕匡做茶記侍應體驗另類人生 中文唔靈光落單有難度 (17:23)

文章日期:2022年07月19日

唱作歌手林奕匡(Phil)近日在全新節目《平行宇宙的林奕匡》中,挑戰「另類人生」,走入茶餐廳做侍應。

揸筆寫音符譜曲當然難不倒Phil,但說到底他在加拿大長大,平日寫中文也「窄窄哋」,更何况走入講效率、講速度的茶記?但Phil相當信心,更自認是「骨灰級」玩家,他說:「因為屋企人開餐館,我6歲開始喺餐館長大,做侍應做咗10年有多,同客人傾偈、招呼佢哋、執枱、落單,所有嘢都做過無數次,只不過以前用英文做。」

講到今次的體驗,Phil坦言:「好似放低自己,係另一個身分,我係另一個人。」Phil續說:「嗰陣時做餐館好忙,我哋一腳踢,各自幫對方,跑嚟跑去,最緊要客人開心,真係好多童年回憶!同客人接觸時,好似幾過癮,啲Memories都返番嚟。相信成為一個侍應,你自己開心,會影響到客人;客人食得開心,佢哋再嚟,亦都可能會打賞多啲!」

今次選址新派懷舊冰廳,首日上班的Phil充滿期待,而且負責人一早給餐牌Phil睇,「見工」時Phil對答如流,對侍應工作滿有信心,但一講到落單,Phil吞吐表示:「我中文唔係幾好。」幸好負責人十分體諒,叫Phil用自己方法落單就OK!

Phil獲派的首個任務,就是到廚房心臟地帶之一的甜品部廚房,製作招牌甜品,他在專業甜品師的指導下,成功捏出蛋撻皮,似模似樣,獲對方大讚之餘,更通過測驗。

Phil坦言:「做廚房本身唔容易,但有一種一條Team嘅精神,做飲食時客人食得唔開心,係最唔爽嘅,希望每個客人都食得開心同Enjoy。」

對於「撻皮Battle」,Phil笑言:「有啲生疏,但喺廚房做嘢係有啲開心,一齊去做一件事、一齊去準備一啲食物,做起畀客人食,雖然我未做到,但感覺到佢哋有一種好團結嘅感覺,好似一家人咁,有啲爽嘅!」

(即時娛樂)