由陳毅燊（ANSONBEAN）、吳家忻（Kayan9896）、林千渟主演的Viu Original首部本地原創劇《#她和她的戀愛小動作》正於「黃Viu」熱播，劇集雲集多位演員客串參演，包括凌文龍、栢天男、梁仲恆、張明偉、陳湛文、周祉君等。
飾演林千渟男友的凌文龍，因為愛吃芫荽而刺中女友「死穴」，慘被狠飛，早前凌文龍為劇集拍攝期間，多次「鯨吞」生芫荽，凌文龍笑言沒難度，皆因現實中他愛吃芫荽，是真正的「芫荽男」：「現實如果女友要我戒食芫荽，我會唔會放棄？如果真係有女仔唔鍾意我某樣行為，而呢個行為係我好愛，我會先尋求協商，如果真係唔得，段關係真係就算啦。」凌文龍自認亦算是暖男，懂得照顧另一半。
周祉君在劇中飾演交友App「電影男」，劇情講述林千渟在交友App認識周祉君，2人相約見面，期間熱愛電影的周祉君，不時扮演電影人物，表現騎呢；周祉君自爆曾經試玩交友App，但未試過成功追女仔：「有段單身時間玩過交友App，仲係用自己張真人相，認識到女仔，但成功率唔高，好少會真係相約。有冇遇過啲奇怪女仔？試過約一個女仔，佢有一種特別氣味，其實個女仔幾靚，但點解會有陣咁嘅味，所以食完餐飯之後就拜拜。」
飾演林千渟前度男友的梁仲恆，劇中講述他是花弗男，經常手機不離手識女仔，為演好角色，梁仲恆一改過往形象，為角色留鬚及夾耳環，他說：「現實中，我當然唔接受低頭族，如果初相識嘅女仔食飯時不斷玩手機，我會扣好多分。」
另外，飾演營養師的陳湛文，他形容角色十分挑剔：「今次飾演好嚴格嘅營養師，無時無刻會同身邊嘅人分析進食熱量、鈉同糖；如果你一超標，就會受到我嘅地獄般指責。」
現實中身形纖瘦的他坦言，從不控制伴侶身形：「由拍拖到結婚都無試過要求另一半減肥，就算我太太生完之後，我都唔會要求佢喼弗，因為身形轉變係無得迫嘅，自己都唔係特別大隻，唔通我另一半想我大隻啲，我就真係去健身咩？」
