近日網上瘋傳一名中學生翻唱MC張天賦的歌曲《記憶棉》的片段，片段中的男學生戴住口罩獻唱，雖然唱到走音及破音，但感情及投入度滿分，他唱到七情上面，兼唱到跪地，片段至今已逾76萬人收看，連原唱者MC都留言叫他加油，MC今天（26日）還轉發該片段，並鼓勵這位男學生，MC先寫道：「先唔講唱功，但真係想鼓勵下佢﹗喺台上就係應該要毫無保留地盡情表演﹗呢個哥仔冇怯場﹑冇緊張﹗繼續加油﹗不過小心把聲。想當年SING CON（歌唱比賽）我剩係敢望住地下，手震晒﹗ #跪地我都剩係試過一次。」
之後MC還在Ig限時動態自揭黑歷史，當年他翻唱周杰倫《雙截棍》，同樣唱到七情上面，MC寫道：「好嘅嘢要重溫。唔准笑人，要笑就笑我，唱歌係咁㗎喇，唱下唱下就好聽㗎啦﹗#全是感情」。
