有「廣告女神」之稱藝人郭思（Suey）最近密密接Job，除了跟多個品牌合作、出席活動、早前又演出音樂劇，同時她和張敬軒、王菀之、魏浚笙拍攝賀歲片《超神經械劫案下》。昨日（20日）她為一個慈善音樂會擔任嘉賓，跟小朋友唱聖誕歌及玩遊戲。
接Job接到手軟，問到是否豬籠入水，Suey謙稱：「冇豬籠入水咁誇張，但應付到自己基本生活。𠵱家多咗工作，其實都好開心，好感恩客人選擇我同佢哋合作。」
她提到拍《超》時發生不少難忘事，最深印象是人生第一次被蜜蜂螫傷，她說：「準備埋位嗰一刻，隻蜜蜂捐入條裙裏面，連續好快速咁針咗我3下，最後工作人員衝晒埋嚟解救，剪爛咗我條裙，先至可以救到我。加上我化咗一個好恐怖嘅妝，但我喺度喊，隻蜜鋒又針我個膊頭，我隻手又郁唔到，好尷尬，最後我邊喊邊講：『唔好意思呀，可唔可以幫我抹鼻涕？跌出嚟啦。』成件事係好搞笑。」
