MC張天賦今天（24日）出席會展舉行的活動，MC明年1月在紅館處男開騷，問他健身方面進度如何？他笑說：「一落千丈，未如理想，我覺得𠵱家要求唔肥就得，我相信演唱會有跳舞環節同自彈自唱，都頗為驚喜，畢竟係我第一個演唱會，自己要練習多啲學多啲，再畀多啲驚喜大家。（飲食方面？）如果講食，真係好多嘢都想食，唔單止聖誕節，平時都想瘋狂打邊爐食海鮮，鑑於閉關養聲同減肥，呢類食物盡可能克制，去到演唱會後同新年之後先食，但當然有忍唔住時候。」
談到歌曲《老派約會之必要》殺入叱咤頒獎禮「我最喜愛的歌曲」最後5強，MC以1敵4鏡仔，他說：「歌曲打入五強好榮幸，因為我其中一首有份參與嘅歌曲，對我喺創作方面，係一個認可，多謝支持我嘅朋友，到時投神聖一票畀《老派約會之必要》。入到五強固然開心，一來大家一人一票投出嚟，二來自己有份參與創作部分，係一個肯定。」MC表示平安夜未有慶祝計劃，可能即興跟朋友食飯，若然沒有約便留家專心籌備自己個唱。
