蔣家旻在今晚舉行的《萬千星輝頒獎典禮2022》獲頒「最佳女配角」，她受訪時稱頒獎禮前兩天開始緊張、心情忐忑、失眠、胃口差，直至得獎後才放鬆下來。她說︰「本身係好平常心，但收到好多公司幕前幕後同事、觀眾留言，加上新聞話我係大熱，搞到我好大壓力，好驚食白果。我開心係好似幫所有人實現咗呢個願望，我覺得我攞獎，所有觀眾開心過我。今年主題係機會留畀追夢嘅人，我追夢追咗16年，當初屋企人都有反對。兩年前攞完『飛躍獎』，今年大家都對我好有信心，加上今年競爭好大，頭先開場時被感動到差啲喊，但攞獎時竟然冇喊。」
被問到是否等將來成為視后才喊，蔣家旻說︰「如果有咁嘅機會，我應該會喊。下個目標，一級一級嚟，希望之後有機會做女主角，呢個都係我夢想。就算係20集嗰啲劇，我都好想試吓做女主角嘅滋味。」她說現在最想食薯片等高熱量及肥膩的食物，並打算請食飯慶祝。
