無綫《中年好聲音》昨（5日）晚播出第十集，是第四部曲首回合《導師分組賽！情歌PK戰！》，19強選手分成三組作賽，是集率先進行「摯親暖歌＋雙語情歌」PK賽，最終表現最為亮眼的，是代表紅組出戰「摯親暖歌」的龍婷和代表藍組出戰「雙語情歌」的李佳和李思林，兩個單位同樣獲得85分佳績。
「小龍女」龍婷獻唱殿堂級歌手甄妮的《魯冰花》，小龍女今次成功搣甩鄧麗君影子，周國豐聽完笑言：「網友成日執着於我話你似鄧麗君，今次係個好開始，你嘅《魯冰花》版本有龍婷嘅elements。」張佳添則說：「畀到驚喜我，你今次對聲音嘅掌控係最細緻嘅一次，你係以技巧取勝，你控制得比以前更加好，聽到有故事同埋有龍婷。」
「二家姐」李思林及李佳這個組合，則獻唱《Ocean Deep》和《愛是無涯》，在導師韋綺姍嚴厲教導下，「雙李」一唱一和非常合拍，兩人完成演出後贏盡掌聲，伍仲衡說：「我啲分主要係畀李佳啲和音，唱和音唔搶係好難，兩個人把聲好blend，李思林真係進步咗，之前聽你唱歌係好驚，爆嗰啲位係爆唔到嘅，𠵱家開始有少少穿透力喇！」蘇永康則說：「兩位說故事非常到位，同埋你哋兩個咬字好好，睇到好多Rita（韋綺姍）嘅影子，佢嘅家族為香港樂壇做咗個好好基礎。」
鮑聖光、梁愷庭及曹敏寶獻唱《Desperado》和《不如不見》，這個組合甫開始便遇上阻滯，皆因分組後的一日，梁愷庭便因要外遊探老爺和奶奶，令三人無法面對面夾歌，只能靠視像隔空練習，最終表現麻麻僅得66分，成為全晚最低分，當中梁愷庭更遭張佳添狠批：「梁愷庭唱時令成首歌嘅音調去到好奇怪嘅位，因為你鼻音好重，同埋個口冇擘大，你嗰part係完全唔知發生緊咩事。」蘇永康則替鮑聖光感到可惜謂：「你聲音嘅厚度演繹呢首歌應該係好好，但個key攞錯咗。」
完成「摯親暖歌＋雙語情歌」PK賽後，蔡立兒率領的紅組、韋綺姍率領的藍組及彭家麗率領的綠組，分別獲得141分、158分及163分，最低分的紅組要淘汰一位成員，經過評審團及紅組導師蔡立兒商議後，最終宣布梁愷庭被淘汰。
