不正常愛情研究所|黃紫恩自爆傾幾個鐘電話 預告新戀情? (19:54)

文章日期:2023年03月14日

J2台《不正常愛情研究所》後晚(16日)的主題是「難捨難離」,J2ers黃紫恩(Jojo)自爆近日有新對象,二人連續傾了數小時電話。她指男士其實不喜歡講電話︰「阿媽打嚟,都係10秒鐘收線。話說前一排識到個新男仔,跟住同佢傾2、3個鐘之後,問佢係咪咁鍾意傾電話。佢答『無男仔鍾意講電話』,但只要男仔肯傾,代表好鍾意你。」Jojo愈講愈興奮,惟後來受訪時否認好事近。她說︰「無啊,跟住無發展,最後都係發現做朋友適合啲,依家做緊普通朋友。」

胡敏芝(Karen)透露有位女友人跟曖昧對象傾電話,男方那邊忽然傳來急促喘氣聲。她說︰「原來個男仔驚入𨋢斷線,所以行樓梯返屋企,佢住20樓。」文頌男(Koba)爆一名港女要24小時黐住男友的故事︰「男嘅要返工,但個女仔要個男仔一得閒就開video call。差不多一星期7日,每日24小時,連瞓覺都要佢開住,可以一瞓醒就見到對方。」Jojo形容事件似主人用cam監視家中寵物,但Karen撲出來自首︰「我都試過,誇張咩?唔誇張呀﹗」伍倩彤(Gillian)亦有類似經驗,但當時未流行視象通話,她說︰「傾完電話唔收線放牀邊,等大家好似一齊咁。」

(即時娛樂)