無綫《思家大戰》第3季明晚（25日）播出新一集，有曾鈺成率領的「香港飯局」隊及樊亦敏率領的「Fan Churk」隊。主持李思捷問曾鈺成平日可有看無綫節目，曾鈺成笑言︰「間中啦，你個節目我睇過1、2次。」思捷再追問他對哪個節目最印象深刻，曾鈺成再放笑彈：「《思家大戰》啦，原來唔識嘢都可以上節目。」
上次錄影時幾乎冇答過問題、坐足一晚冷板櫈的樊亦敏，今次以「Fan Churk」（翻焯）隊名義捲土重來一雪前恥，只是陣容與上次略有不同，由謝東閔頂替馬貫東。樊亦敏答問題時表情多多兼跳跳紮，其隊員陳浚霆則表現肉緊，搶答問題時差點撳爆鐘仔。
曾鈺成答題時除了多次「執雞」成功，答其中一條問題時更做出一個驚人動作，笑爆全場。今集其中一條問題「李思捷係一個乜仔？」，再令李思捷成為攻擊對象，答案有「飛仔」、「衰仔」、「死仔」及「懵仔」等。
曾鈺成接受無綫娛樂新聞台訪問時，稱如能在節目中贏到獎金獎品，會全數撥捐公益金。
