《2023香港小姐競選》16位佳麗正在越南拍外景，穿上仙氣白裙前往被列為世界文化遺產的美山聖地拍MV。經過連日來密集式訓練，她們在擺甫士及跳舞方面愈來愈熟練，無論有幾累和熱，一見鏡頭即露出笑容；彼此感情亦愈來愈好，不用埋位時雞啄唔斷，有講有笑。
美山聖地外景拍攝初段烈日當空，熱到台前幕後汗流浹背，中途卻落暴雨兼行雷閃電，數度打斷拍攝流程。雖然要日曬雨淋很辛苦，一眾佳麗感恩獲工作人員貼心照顧。（6）胡睿涵說：「行雷閃電？唔驚呀，工作人員好有準備，一早準備定遮，好照顧我哋。」（8）姜依宁曾因壓力大爆喊︰「我覺得自己做得唔夠好，笑容唔夠，要更加努力。」她感謝（13）陳曉彤及（15）莊子璇全程陪伴及打氣，令她破涕為笑。
談到行程中的趣事，莊子璇說：「噚晚我哋大概1點零瞓，但瞓前點都要敷面膜。我敷住面膜去咗第二位佳麗間房，點知冇為意瞓着咗。我個零鐘後醒番，塊面膜已經乾晒，弄巧反拙。」（4）王怡然透露︰「我同（14）陳怡名3個人去買嘢，大家都以為大家身上有錢，於是買咗好多零食，點知畀錢時發現原來大家都冇帶錢，最後返酒店攞錢先再買。」
