資深移民顧問關景鴻於6月逝世，終年66歲。景鴻集團於官網發布集團創辦人兼董事長關景鴻博士，於2023年6月與世長辭。
林建明是第一個為該移民公司拍宣傳片的合作伙伴，對於關景鴻離世一事，林建明接受《明報》訪問時，感到相當難過，她說：「唉﹗我唔係今日知，早幾日確實，之前一直傳，因為佢好低調，佢哋家人及公司嗰邊，好多人問同搵佢，見佢冇回覆，打去佢公司，今日佢個女公布，其實關景鴻移民顧問公司，我係佢第一個拍宣傳片嘅合作伙伴，合作咗好多年，後來先搵趙雅芝佢哋做。」
林建明讚關景鴻為人好好：「佢成日話『冇你冇我』，即係話冇我就冇佢，佢當日冇人識，我幫佢冇乜所謂，拍好多廣告，後來佢事業蒸蒸日上，佢做嘢及個人都好叻，都好好，先有呢個成績，唔係因為我嘅關係...
（哽咽）真係好突然﹑好難過﹑好心痛，當年我成立『心晴行動』，冇話搵佢捐款，但佢睇到新聞後，知道有呢個慈善機構，佢主動問我要捐幾多畀我而成立呢個會，佢真係好到不得了，我要調理下心情先得。
佢喺慈善公益不遺餘力，『心晴行動』如果有乜需要搵佢，佢完全冇托手㬹，佢個人彬彬有禮，客客氣氣又心地好，好盡責。」
