身在美國的李施嬅今天（28日）在社交平台上載短片，分享剛剛與朋友到洛杉磯比華利山遇上的驚險事。
她說︰「今日我同兩個朋友去咗比華利山，買完咖啡坐咗喺架車度飲。佢哋兩個坐前面，我坐後排。跟住無端端有個流浪漢開咗道門，坐咗喺我隔籬。我當時唔識反應，喺度諗我係唔係應該衝出架車大嗌呢？但我驚咁樣會激發咗佢襲擊我朋友。最終我決定唔出聲，唔郁，完全好似透明咁，希望佢見唔到我。我捉緊個電話，希望佢唔好搶我個電話。你睇我唔到﹗你睇我唔到﹗跟住我朋友就同佢講『你要落車啦，我哋唔係UBER』，佢就話『係咩』。我朋友就話『係呀，你再唔落車，我哋就報警』，跟住佢就話『你哋唔會囉』。嘩﹗嗰陣時我係震晒，但又唔敢郁。然後，我朋友就好醒，將所有窗校低晒，跟住攞個電話出嚟話依家就報警，佢先至肯落車。」
李施嬅回想事發過程雖然只是短短兩分鐘，但感覺像過了一個鐘。她續說︰「我成個人震晒，好恐怖﹗大家以為安全嘅地方，去到比華利山，以為唔會有啲咁嘅事發生，原來都會嘅，所以大家要小心，上車一定要鎖門，警覺性高啲，仲要留意吓四周圍有冇啲奇怪嘅人。」
