謝安琪（Kay）、樂隊The Hertz與音樂人Jan Curious（阿水），昨日（9日）為《未來音樂祭》連線開Live。
直播剛開始，身穿粉紅色睡衣的張靖（KaKaBall）驚喜亂入，Kay為女兒輕撥頭髮：「好得意呀，佢個頭髮。」又齊齊望鏡頭擺甫士，KaKaBall攬實Kay介紹自己：「Hi，我叫KaKaBall。」完全零怯場，兩人互動令網民高呼「很可愛」。
談到這次是Kay與The Hertz首次同台演出，The Hertz透露Kay為演出曲目翻聽他們所有作品：「真係好開心，我哋知道Kay有聽過我哋全部作品，因為佢連我哋side track嘅歌都有揀。」Kay笑指是邊揸車邊聽：「如果你聽開咩類型嘅歌，佢會feed返你鍾意嘅嘢出嚟㗎嘛，The Hertz係成日出現喺我個歌單㗎，我真係全部聽晒㗎。」Kay更於直播中向The Hertz邀歌，他們即興奮到跌電話，場面搞笑。
Kay坦言自己的歌傾向抒情類型，因此特別期待當晚演出的氣氛：「我哋有啲歌天生就幾friend，有啲就...大家到時聽啦。」 雖然他們大賣關子，未有於直播中透露演出詳情，但他們笑指已準備好流汗及跳到腳軟。 問到他們最期待的演出單位，Kay即回應是Moon Tang（鄧凱文）及岑寧兒（YoYo）：「佢哋係我心目中最靚聲嘅女歌手，之前有人問過我最靚聲女歌手係邊3個，我答完Moon Tang同YoYo，第三個就好不知廉恥咁揀咗自己。」
Kay與The Hertz將於台上首次合作，他們早前已共同參演電影，但未有同框演出，Kay說：「我好自豪，有份參演嘅超過九成係本地音樂人，阿水都有份㗎，我同阿水有對手戲。今次係幾難嘅戲，因為拍攝月分好凍，我哋長期好似一班好怕凍嘅人喺度瑟縮咁，但係好開心，有好幾個年代嘅音樂人參與。」被問到屆時會否全家總動員現身《未來音樂祭》，Kay笑謂：「梗係要啦，不過6歲（指囡囡）唔知入唔入得？」
