草蜢早前（23日）參與彰化建縣300周年「上吧！彰化藝起慶生」晚會，以壓軸嘉賓出場勁歌熱舞，跳唱《失戀陣線聯盟》、《寶貝對不起》及閩南語歌曲《有緣來作伙》等。現場逾30000觀眾反應熱烈，蔡一傑感動眼濕濕。他完成演出後興奮表示︰「今晚好開心，見到好多粉絲，大人、小朋友都好熱情，感覺好似返到草蜢初出道時跑宣傳，因為喺台灣有好多回憶，諗番以前去電視台錄影、商場，甚至公園表演，超級開心。真係全身濕晒，天氣熱啦，我哋又好賣力又唱又跳，觀眾太好，太惜草蜢！」
身穿粉紅Deep V上衣的蔡一智，熱到長髮滴着汗。他說︰「好開心嚟彰化，原本嚟出席一個表演活動，完騷之後我覺得好似去完游水一樣，全身濕晒，今日應該係『泳會』，觀眾反應好掂呀！」蘇志威火速換衫後說︰「今日天氣好熱，場面好熱鬧，雖然我哋草蜢經常到台灣開騷和宣傳，但好少到彰化，所以今次彰化嘅歌迷終於見到『本尊』，真人又唱又跳，佢哋特別開心。我哋喺台上都好開心，因為台下反應愈勁，我哋台上就愈落力。剛才跳舞著嗰件衫都扭出汗水，唔係誇張。希望下月28日高雄巨蛋演唱會同樣咁熱情，香港歌迷都飛嚟一齊熱鬧啦！」
