張衛健（Dicky）早前再與藥廠合作，以代言人身分換上6款不同造型為中成藥拍廣告。拍攝當日天氣酷熱，Dicky笑言要「嗌救命」︰「真係熱到離晒譜，仲要拍我打拳，我都驚自己熱到爆血管，不過做演員都習慣晒，冬天拍夏天嘢，夏天拍冬天嘢，好彩啲動作都好簡單。」為配合不同造型，Dicky與團隊花了兩日時間到訪不同場景拍攝。雖然兩日拍攝逾20小時，他未見疲態，更與工作人員打成一片。
他說︰「坦白講，真係開心嘅，同導演劉翁合作得好愉快，大家一齊傾吓偈講吓笑，我都好享受。」Dicky坦言有衝動再拍攝香港劇集，回憶對上一次已經是電視劇《大帥哥》。他說︰「拍《大帥哥》之前，又隔咗好耐冇拍講廣東話嘅戲，對我嚟講，可以用廣東話演戲，係一件好舒暢、好有快感嘅事。」
Dicky入行多年仍保持一副童顏，他透露與自己的好奇心及追求優質生活有關︰「無論幾多歲，都要追求緊一啲嘢，保持好奇心，要學習、提升，令自己進步。最近我想學急救，即係如果身邊有人有事，甚至係咁啱遇到嘅任何人有問題，我都可以幫手，我覺得呢樣嘢終身受用，可能真係救咗人哋條命，甚至人哋一家㗎喎。」
