毛舜筠由影后變設計師 感謝老公做「幕後高人」 為服裝獻計 (15:36)

文章日期:2023年10月23日

影后毛舜筠(毛姐)日前現身澳門,出席服裝節時裝騷,毛姐感謝「幕後高人」兼老公區丁平支持,以專業眼光提供意見,她笑指自己從來不是設計師,過去30年亦由設計師指導她的服裝配搭:「我嘅Designer就係Tony Au(區丁平)我老公,有佢喺度我定好多,如果唔係隨時要我交貨,我真係唔知點算。我諗我嘅意見,對佢嚟講好有挑戰性,所以佢都好投入去做。」

毛姐亦稱讚丈夫是幕後功臣,今次合作令大家做了快樂的事:「佢真係大師,呢方面我好尊重佢,同埋佢畀嘅意見好有建設。」毛舜筠笑言兩人在生活上偶有衝突,但在這次設計上,她笑言「冇得有say」:「佢真係有多一隻眼,喺呢30年婚姻入面,我見到佢喺呢方面真係有天賦。佢一叫我『轉個圈』我就轉個圈﹑『打側睇下』就打側。」

毛姐表示做夢也沒想會出到一條Fashion Line,她今次做到了感到期待:「其實除了T恤、褲和背心,秋冬有羽絨背心,還有斜孭袋和帽,正式發布應會在12月。

(即時娛樂)

相關字詞﹕毛舜筠 區丁平