Me&玩快閃 哄動商場玩驚喜 Mandy黃淑蔓Vian感動忍淚 (14:16)

文章日期:2023年11月13日

籌備2年,寰亞全新女團Me&正式出道,成員譚旻萱(Mandy)、黃淑蔓(Feanna)和連家穎(Vian)昨日首度公開表演,帶著全新歌曲《Eye to Eye》與8位女Dancers突襲啟德一個商場玩快閃,全場驚喜,吸引數百人圍觀,有Fans帶燈牌聞風而至,場面熱鬧。

首次在觀眾前跳舞的Feanna說:「我係超級超級緊張,但唔知我嘅緊張,源自於興奮定係點樣。未出場之前已經想喊,結果表演完,返入後台就即刻搵一個最深愛嘅人(經理人)攬住嚟喊。我覺得好開心,我哋辛苦咗2年,第一次公開演出,我覺得係大成功,辛苦晒!」Mandy對她說:「我完全唔敢攬你,你個樣係叫我唔好同你講嘢,一攬你,你就會喊㗎啦!」她笑言當時唯有立即轉「好兄弟mode」,希望不要令Feanna哭出來。

至於Vian之前都試過玩快閃,但今次感覺很特別,她說: 「我相當興奮!我以前只係喺銅鑼灣街頭快閃,跳人哋嘅歌,今次係跳自己嘅歌,感覺完全唔同,除咗興奮,就好似Feanna咁講:極感動!我哋真係準備咗好耐,見到好多親朋好友嚟支持,終於可以畀佢哋嚟睇吓我哋呢兩年準備嘅嘢,相當感動。」

她坦言表演時腦內一片空白,說:「其實我一路跳舞,個腦一片空白,完全唔知自己跳咗乜嘢,只可以靠肌肉記憶,所以『練習』真係可靠!」同樣感到興奮的Mandy說:「我腎上腺素急升,唔記得自己做咗啲乜嘢。見到好多朋友嚟睇,所以好有信心,完全無質疑過,相信係『得嘅』,我份人乜嘢都『得得得』,今鋪一定『得』嘅,結果『得咗』!」

表演時Me&都好淡定,信心十足,開始前她們互相打氣,不用言語,完全是默契。Feanna說:「我喺台上有偷偷地睇你哋。」Vian說:「我都有呀,我都有呀!」Feanna說:「我睇下你哋點呢?結果你哋都超靚。」Vian當時拋出「信心十足」眼神給Feanna。而Mandy輕拍她們打氣,Feanna說:「我感覺到,勁感動呀,當時我已經想喊啦!」

至於下一個舞台,Feanna充滿信心和期待,她說:「我哋下一個舞台會準備得更好,今次快閃係好好嘅練習機會。首先我哋係第一次喺咁多人面前跳呢首歌,第二就係夾埋Dancers,其實我哋今日唔係百份百完美,有進步和學習嘅地方,吸收咗今次經驗返去再練習,期待下次帶到一百分,更完美嘅表演畀大家。」Mandy說:「今次只係跳舞,下個舞台會加埋唱歌,要更加用力。都係嗰句:得嘅!」

快閃跳舞後,Mandy與Feanna和Vian做快閃店長,Feanna與Vian派特飲,然後再會合Mandy到5樓的戲院派爆谷,吸引大批Fans排隊簽名和合照,非常熱鬧。

(即時娛樂)

 

相關字詞﹕黃淑蔓 譚旻萱 連家穎