江若琳（Elanne）今年6月誕下麟兒Owen，產後Elanne專心相夫湊仔，昨天（22日）她終於完成「人奶之路」，Elanne在社交平台貼出抱住5個多月的B仔片段，並分享5個月來餵哺母乳感受：「記錄一下！我畢業啦﹗歷時5個月16日既人奶之路完結啦，由最初day 1決定餵人奶，我都無諗過自己可以咁堅持，不過呢兩星期開始，BB好憎好厭人奶，我以為佢只係厭奶期，每次食奶都好似逼佢咁，可能因為時間耐咗，已經開始無味？又或者唔夠瞓，又追唔切，又有時食得唔夠好，唔夠濃？
今（昨）日仲爆喊，但每次只要一飲奶粉就好開心，秒清！我知道係時候要完啦！雖然離我既目標，仲差半個月，但我盡咗力啦，我唯有按住BB嘅意願去行啦！仔，雖然呢5個幾月真係好辛苦，我都成日呻辛苦，但原來當知道要完，係有十萬個唔捨得，呢5個幾月見到你肥肥白白，實實淨淨，係超大嘅成功感！正正呢兩日開始加固，我又要學新嘢啦﹗我會努力煮好嘢俾你食，我哋加油﹗#我可以飲咖啡凍檸茶啦 #人奶媽的辛酸」。
