陳柏宇（Jason）日前出席《懷舊是一種品味之「回憶收賣佬」活動》，於黃昏Magic Hour時跟粉絲見面，獻唱新歌《懷舊是一種品味》、《一人傍晚藝術館》及《金草莓》，又宣布新碟《in Rhythm》將於12月19日推出，出碟前一天會跟歌迷舉行聚會。
Jason在活動上分享童年回憶，他說︰「我有好多好舊嘅回憶都係同婆婆有關，例如移民加拿大嘅時候同婆婆一齊去老麥買雪糕，我細個時，佢教我打麻將。仲有太公，讀小學嗰陣，返屋企食lunch經常會有腐乳撈飯，再加蒸豬肉，咁就一餐。我通常會記得同朋友、屋企人嘅相處居多，反而唔係擁有過乜嘢物件，或者物件帶畀我乜嘢感覺，依家就會同兩個女去製造一啲回憶。」
Jason的5歲大女陳羿辰（Abi）當日亦有現身活動，她除了在爸爸幫助下表演後空翻，更與爸爸合唱。Jason讚女兒說︰「你今日有好大進步喎！唱咗兩句，我以為會笠水，但你證明我係錯。」此時，Abi突然表演一字馬，更問爸爸可做到。Jason啼笑皆非，只好說自己做不到。
