張學友自嘲聲線靚到令人瞓覺 拒用「老」字 氣質更成熟 (15:12)

文章日期:2023年12月12日

張學友昨晚(11日)在紅館舉行《60+巡迴演唱會》第2場,亦是其第68場巡唱,一連12首歌又唱又跳後,心情大靚的學友滔滔不絕與觀眾互動。

學友感謝觀眾工作完一天,仍選擇入場,他說:「我知大家平時工作有好多壓力,邊度有一帆風順呢件事吖?冇嘅,只要搵到適當方法發泄就得,所以大家嚟到紅館,就唔好客氣,盡量用自己方法來發泄,鍾意嗌可以盡量嗌,鍾意唱歌可以同我一齊唱,大聲啲冇所謂,當然如果覺得好攰,想瞓覺都冇問題,雖然我見到會傷心啲,不過覺得我嘅聲音適合瞓覺,你咪瞓囉!我會安慰自己把聲真係靚,居然可以聽到瞓覺,覺得我好笑亦可以隨便笑,大家可能諗起《東成西就》、《阿飛與阿基》,冇所謂,我拍戲都係以喜劇為主,導演覺得我好笑,先搵我拍,係咪先?」

學友表示1984年出道,唱了近40年,也不敢相信很多觀眾當年才出世,他說:「相信我嘅歌陪大家度過好多開心或唔開心日子,如果大家聽到啲歌有感觸,可以喺黑暗中隨便喊,聽講喊都係發泄,喊完舒服晒囉!」

學友指也不相信自己60+,1987年舉行首個演唱會,記得當年很自戀,今次開騷不同之處是成熟了,他說:「好多人叫我唔好用個『老』字,所以係成熟,就係成個氣質唔同以前,當年唱歌曲《Ooh La La》,唔知點解咁大膽,穿閃背心,又唔記去曬(黑),白雪雪咁,又唔記得去練,好似一隻豬咁,咁都夠膽去唱。」學友即席表演一字馬,揚言自己仍然可以,望練到左右腳落地都成功。

學友特地多謝香港歌迷,令他克服心理關口,因遞咪給台下觀眾時,大家都懂唱,還唱得很大聲,令他不怕面懵。昨晚清唱環節,學友選唱《還是覺得你最好》,安歌環節以《月半彎》及《吻別》作結,今晚休息一天,明晚(13日)舉行第3場。

(即時娛樂)

相關字詞﹕張學友 60+巡迴演唱會