古巨基跟囝囝首次父子同框拍廣告 指Kuson愛畫畫唱歌 (15:52)

文章日期:2024年01月12日

古巨基(古Sir)最近為銀行代言拍攝廣告,廣告中驚現兒子Kuson登場?原來是古Sir囝囝嬰兒時的影片,但也算是首次父子「同框」出現在廣告,值得紀念。廣告故事關於香港中生代,上有父母下有兒女,要肩負整個家庭照顧老幼的一群,如何面對理財人生。

今次廣告用到囝囝影片,原來導演看過基仔Ig曾分享過兒子嬰兒時片段,於是提出在廣告可否借用片段,讓基仔作為父親的角色更寫實。他說:「我諗反正已經係社交平台分享過,所以就答應。係Kuson BB仔時影片,再次重溫呢啲片段,仍然係充滿感動。我記得當年抱住剛出世嘅Kuson,佢好細隻又輕,我細細聲同佢講:『歡迎你啊,我哋等咗你好耐喇。』個份感動係一世都咁深刻。」

拍廣告當日,Kuson也有探班,在現場感受爸爸工作:「到時廣告出街我會叫佢睇,佢認唔認得嗰個係佢?佢認得㗎,佢成日都翻睇我哋手機佢BB時候嘅影片,成日自己睇到笑。」

問到兒子長大後,會否讓他入行?古Sir說:「吓?仲有咁長遠,𠵱家先幾歲,第時佢想做邊個行業,佢自己自由選擇啦﹗只要佢做自己喜歡嘅事,先係真正幸福,佢𠵱家最鍾意畫畫﹑唱歌同埋玩車車。」

古Sir表示自從有了囝囝後,更加重視計劃理財,跟太太找專業人士幫手,等夫婦可以更專注家庭生活和事業。

(即時娛樂)

相關字詞﹕古巨基 古Sir