甄子丹放手讓愛女靠自己闖樂壇︰有挫折反而知人生路點行 (18:03)

文章日期:2024年03月01日

年度馬壇盛事《寶馬香港打吡大賽》將於3月24日假沙田馬場舉行,甄子丹今年續任「寶馬香港打吡大使」。他早前為打吡大賽拍攝宣傳片,以自身經驗表達「專注」、「決心」及「堅持」3大致勝元素。拍攝當日,甄子丹在木人樁前出拳、踢腿。雖然這些動作對他來說易如反掌,但他於正式拍攝前仍特意與導演、攝影師溝通,務求令鏡頭擺位、取景及動作流暢而精準;拍攝時又每個動作也做多少少,讓導演有更多鏡頭剪接用,十分細心。他直言以精準、專注的態度做事,是因為不想後悔。甄子丹說:「時間寶貴、生命寶貴,如果每樣事唔精準去做,會有少少遺憾。你會話畀自己聽,點解當初唔做得更好呢?依家嘅我,尤其拍戲咁多年,唔希望喺電影上冇進步,所以我放更加多時間去做每個電影項目。當然,唔可以話完美,但係你有心去做,就自然有機會做得更好。」

談到上屆打吡大賽的冠軍賽駒「遨遊氣泡」賽前不被看好,甄子丹回憶也嘗過這種滋味︰「人唔會樣樣都一帆風順,一定會有阻滯,甚至乎跌落地下,最重要保持信念、堅持同努力。機會嚟到,就可以勇往直前,爭取到更高嘅高峰。唔好放棄,話畀自己聽,雖然過程唔係事事順暢,但會好快過去,之後就會有另一個高峰,見到成功帶來嘅滿足感。只要抱住進取心,就會克服所有困難,做人亦如是,每日都要經歷好多小問題、困難甚至波折,但係唔緊要,最後你能夠過到呢一關,就會獲得更多。」

愛女甄濟如早前以歌手身分出道,甄子丹認為每個父母都會和子女分享人生經驗,但他認為讓子女親自闖闖更有意義。甄子丹說︰「依家後生仔女好聰明,佢哋有自己諗法,應該畀佢哋試自己去闖一闖。無論成與敗,一時嘅失敗唔等於將來唔會成功,有時有少少挫折反而知道人生條路點樣行,我同太太都用比較開明嘅方法同佢哋相處。」對於將來與女兒在演藝上的合作,甄子丹暫時沒有想法︰「順其自然啦。初初我哋冇諗個女走呢行,佢由細到大好鍾意音樂,9歲開始唱歌,14歲已經寫咗好多歌,佢喺呢方面的確有天賦。最初好多唱片公司想簽佢,我哋一直想佢讀好啲書先,到後來我發覺佢真係食呢行飯,有呢方面嘅天賦,所以依家由佢享受吓,吸取多啲經驗。」被問到會否有機會與女兒齊齊擔任打吡大使,他笑言:「一切皆看緣分。」

(即時娛樂)

相關字詞﹕甄子丹