陳瑞輝唔介意被誤解 跟陳卓賢啱Channel 學Ian做行動派 (21:54)

文章日期:2024年03月01日

MIRROR成員陳瑞輝(Frankie)首支派台作品《皮思苦》是他內心剖白,讓大家知道有時外界對他可能有誤解,但其實眼看未為真,有時要深入了解,才會看到真正的陳瑞輝。早前他拍攝歌曲MV,以幾可亂真的場景,比喻別人看不到他那鮮為人知的一面。

歌曲由Oscar填詞,在溝通的過程中,Frankie說:「原來我同Oscar都有好多共通嘅諗法,覺得如果由佢擔任MV導演,可以將《皮思苦》嘅精髓放入MV裏面,我邀請佢執導,並採取絕對信任。」

Oscar以虛幻嘅場景,比喻Frankie的個性。Frankie說:「Oscar起初同我講個Idea,係將鏡頭入面睇到以為係真嘅嘢,再Show清楚畀大家睇嘅時候,原來係假㗎!聽完覺得好得意,但又覺得好難實現到,不過Oscar將想法實現,例如我身上用紙造嘅白色西裝,仲有燈同電話蛋糕,真係冇諗過全部嘢都咁像真,唔知大家睇MV,發唔發掘到邊啲係真,邊啲係假呢?」

說到大眾對自己的誤解,Frankie分享過去一次經歷,他說:「試過去睇戲,散場好多人,有個Fans見到我,想搵我影相,但因為喺扶手電梯,好多人,唔方便停低,我就婉拒了,後來發現佢有DM我話唔開心。呢件事我都唔開心,但我又唔可以直接同佢講原因何在,又冇時間交代清楚就要趕住走。其實成日都有好多呢啲我做得唔好、做得唔足夠,令大家對我期望有落差嘅事,但自己總覺得唔緊要,大家之後都會明白,同埋Fans會知道真正嘅我係點樣,會繼續支持我,有大家繼續陪伴就足夠。」

Frankie又舉出了另一個例子。作為MIRROR的成員,在參與團綜時,Frankie總予人是團欺對象,但Frankie說:「我又唔覺得係團欺嘅,大家睇得好開心,我又嘗試去Enjoy,感覺都OK,先會有咁嘅形象出現。以前嘅我未必係咁,但久而久之,鏡頭以外,我都變成係咁,呢啲係自己不知不覺嘅轉變,但其實我係比較單純、直接、慢兩拍嘅人。」

Frankie談及與陳卓賢(Ian),早前在MIRROR演唱會,一同擔任其中一晚彩蛋,觀眾見2人拖手合唱,尖叫聲震耳欲聾,Frankie戴耳機也清楚聽得見。正當大家以為這是罕見的CP,但其實Frankie與Ian份屬好友,Frankie道:「我同Ian最夾係Lay Back嘅態度,比如對於一件事嘅感受,Alton(王智德)、AK(江𤒹生)會即時表態,但我同Ian都係唔會即刻分享感受嘅人,會諗過度過先講出口,而Ian係會附帶行動力,諗完會出聲表達想法,而我就會唔講出口居多,但我哋好多嘢都有相同嘅想法。」

Frankie笑言往後日子除了要以最自然、最真的一面,面對鏡粉、皮寶寶,面對大眾外,同時亦會像Ian一樣亦要添加一份行動力,讓大家更了解陳瑞輝是怎樣的一個人。

(即時娛樂)

相關字詞﹕陳瑞輝 皮思苦 陳卓賢