《高山低谷》10周年 林奕匡登TFT 陪太太產檢 喜上眉梢 (11:51)

文章日期:2024年03月05日

林奕匡(Phil)的經典歌曲《高山低谷》推出10周年,他早前應邀參與日本著名音樂頻道The First Take(TFT)的一鏡到底錄音演出,演繹全新編曲的《高山低谷》。Phil昨晚(4日)與歌曲監製Edward Chan,以及作詞的陳詠謙開Live,談及參與TFT感受,以及即將為人父的心情。

今次Phil是繼陳柏宇及MIRROR後,第3個歌手單位成為香港代表,參與The First Take錄音,他作出周詳準備,他說:「我哋重新度過首歌嘅編排,同埋唱法都唔同咗,會諗下受眾係邊個,唔想一模一樣感覺去唱,因為事隔10年,自己嘅人生同經驗,會令自己有唔同感受。我都有練習多啲,仲特登買咗喺正式錄音時,會用到嘅Headphone喺屋企練習,又會睇下唔同嘅表演者,喺TFT會點唱,台風係點,又研究下鏡頭擺位,自己喺屋企事先預演一次,希望可以減低緊張程度。」

進入錄音室時,Phil免不了緊張,他說:「進入錄音室嘅時候,緊張一定有,但估唔到原來大家平時見到個畫面,好似只有自己一個人喺度,但入到去其實鏡頭後有最少接近30人做準備,有啲意想不到,到正式錄音時,大家全部離場。」從錄影片段中,Phil以一貫微笑表示:「Okay I'm Ready!」然後他便陶醉音樂之中,中段唱到肉緊之時更緊握拳頭。

錄音過後,Phil也即是鬆一口氣,他說:「當下第一時間諗到『Oh My God! 錄完喇!』因為籌備期間練習幾多次都好,正式嘅時候係有好多Pressure,但完成嗰一下,成個人即刻放鬆,可以Enjoy The Moment多啲,我仲同每個同事都擁抱。」能夠在《高山低谷》推出10周年登上TFT,Phil坦言莫大榮幸。

《高山低谷》對於Phil來說別具意義,因為當時這是一首決定Phil歌唱事業的一首作品,他一直銘記歌詞內容,他說:「《高山低谷》記載住我人生好重要嘅一刻,由最唔開心到我企得番起身,𠵱家呢首歌成為咗鞭策我嘅歌,佢唔係淨係講低谷要點樣面對,佢仲可以講到喺人生唔同期間,都會遇上唔同高山低谷,會時刻提醒我,要繼續行落去,個終點依然未達到,唔可以停唔可以放棄,就好似歌詞咁講:腳下路程難以削短。」

在昨晚開Live的時候,陳詠謙特別提到《高山低谷》歌名的由來,他說:「本身未有歌名,係先寫咗『你界定了生活 我侮辱了生存』呢句,但前面加多句『你快樂過生活 我拼命去生存』,令成份歌詞有一份推進。後來見副歌前有3連音的部分,想到『高的山低的谷』呢幾隻字,加上香港好多山,有錢人又多數住喺半山,配合埋前面歌詞,就有《高山低谷》呢個歌名。」

昨晚TFT首播,加上早前Phil宣布太太佗B,今年準備當爸爸,正值人生美好的時光,Phil分享心情:「我唔覺得自己𠵱家喺高山,因為覺得可以再好啲,同時亦都會提醒自己,唔好畀自己入到低谷,繼續鞭策。」當談及BB的時候,Phil難掩將為人父喜悅,他笑著透露:「今(昨)日開Live前啱啱陪太太睇完醫生,BB又大咗好多,今(昨)晚 又有另一個BB TFT出世,的確係開心!」

(即時娛樂)

相關字詞﹕林奕匡 高山低谷