柳應廷變「怪誕Jer」 新歌受添布頓影響 自認行為怪異愛大叫 (17:31)

文章日期:2024年03月14日

由推出第一首單曲《水刑物語》開始,柳應廷(Jer)一直在創作與主流音樂作品,為樂迷帶來驚喜,同時亦予人怪誕感覺,不過Jer覺得怪誕有其獨特魅力,就好似他的偶像導演添布頓(Tim Burton),受人愛戴追捧,而Jer的新歌《筆觸男孩憂鬱之死》,就是唱出Jer在音樂創作路上的心聲。

Jer鍾情添布頓作品,今次新歌創作靈感,原來也來自添布頓。Jer說:「我好喜歡添布頓創造嘅世界,不論畫作還是電影,荒誕得嚟又帶有獨特嘅魅力,《筆觸男孩憂鬱之死》就係由佢畫家同導演呢個角度去切入:無論你係乜嘢人,只要相信自己,堅持做自己覺得啱同開心嘅事,最終會建構到屬於自己嘅世界。」

今次Jer找來全新班底合作,包括作曲的T-Ma及填詞的鍾說,來個新嘗試,Jer很喜歡這個組合,他說:「 T-Ma好快就諗到好得意﹑而市面上又唔多見嘅旋律,至於鍾說,我哋傾歌詞內容時,都不其然講起尊尼特普(Johnny Depp)同添布頓,於是我哋就諗到不如用畫家角度,唱出我嘅想法。」

既然歌詞內出現添布頓元素,今次MV也順利成章,讓Jer以怪誕造型演出,Jer說:「我好鍾意電影《怪誕屍新娘》,MV其中一個黑白間西裝造型,靈感來自電影裏面主角Jack,而我身上嘅玩具:恐龍、權仗、車、玩具珠寶等等,代表每個人內心慾望。此外,我個妝就好似一個畫家,喺我塊臉繪畫,畫咗唔同彩繪。」

Jer飾演的瘋狂角色,就是創造家,在蘇醒帶大家參觀他所創造地下收藏室。Jer續說:「其他角色嘅眼耳口鼻,都畫喺唔同地方,呢啲都係我所創造人物,喺收藏室裏面,每通過一道門,就好似帶聽眾逐步深入我嘅收藏世界。」

添布頓被形容為怪誕導演,那麼Jer也是怪誕的人嗎?他說:「我都係怪怪哋嘅人,因為我鍾意玩,行為有時有啲怪異,例如成日大叫、暴走,打牌自摸都會咁,我有時都控制唔到,玩起上嚟會好癲,我唔驚『怪誕』呢個形容詞,亦唔覺得陌生,只要自己開心Enjoy就得,實行用自己魅力感染人哋。」

(即時娛樂)

 

相關字詞﹕柳應廷 添布頓