陳法蓉撐LOONG 9團名夠潮︰依家冇人再講Dragon Year (13:34)

文章日期:2024年03月17日

無綫選秀節目《亞洲超星團》選出9名練習生組男團「LOONG 9」,團名一出即成為網絡熱話,發音被不少網民取笑,亦令人想起陳法蓉多年前在電影《賭俠》中的角色名「龍九」。陳法蓉昨晚(16日)出席慧妍雅集42周年慈善晚會時,稱節目宣布團名時,不知道外界會聯想到「龍九」。她說︰「其實『Loong」這個字好潮,依家冇人再講『Dragon Year』,係講『Loong Year』﹗志偉哥話9個人,所以叫『龍九』幾特別。網民好有創意,整咗好多片,笑到我流眼淚。我又唔介意,仲分享畀洪欣等朋友睇。洪欣囝囝鎬濂話唔知我演過呢個角色,佢哋都話幾搞笑。」

陳法蓉稱無綫曾找她擔任其中一集《超星團》的評審,但因好友洪欣兒子張鎬濂是其中一位參賽者,為免被指不公平而婉拒了邀請。張鎬濂未能勝出入團,她說︰「參加比賽都想贏,我同佢講最重要係享受過程。佢喺過程中都得到好多經驗,Rain都讚過佢幾次。」陳法蓉透露正與無綫洽談鍾澍佳監製的新劇,被追問是否傾《新聞女王2》時稱不知道劇種。

除了陳法蓉,昨晚出席慈善晚會的還有慧妍雅集主席李潔瑩與丈夫黎諾懿、朱玲玲、趙雅芝與丈夫黃錦燊,鄭文雅、向海嵐、王愛倫、劉倩婷、翁嘉穗、岑杏賢、莊思明等。

(即時娛樂)

 

相關字詞﹕亞洲超星團 陳法蓉