劉威煌事業曾跌入谷底 參加《中年好聲音2》被太太反對 (22:12)

文章日期:2024年06月01日

45歲劉威煌2009年參加首輯《超級巨聲》入行,2017年一度因生計放棄歌手夢,去年年底他相隔15年再戰歌唱真人騷《中年好聲音2》,他時隔多年自資出新歌《普通人》。劉威煌接受商台《星光背後》訪問,分享15來由「威煌隊長」廣為人識,到飽受網絡欺侮被封為「常威」或「億萬駙馬」,事業跌入谷底的心路歷程。談及再參賽及再出歌的野心,他直言 :「再想紅呢啲已經係好傻,真係好純粹想有一個舞台。」

出道前,劉威煌人如其歌《普通人》,曾經當了10年打工仔,月入達二至三萬,後來放棄穩定入息簽約TVB放手一搏,他說:「本身做咗十年印刷sales,返五日工,禮拜六、日參加一啲小型唱歌比賽,慢慢都有啲fans,偶然之下有fans自己幫我報咗《巨聲》。入行之後其實冇乜計劃,當時機會比較多,《巨聲》有演唱會,有得出歌,又有annual dinner,覺得收入同之前份工差唔多,金額算滿意,可以話有發過明星夢。」及至劉威煌2015年提早解約,只演過兩齣劇及唱過兩首劇集主題曲,他承認當年曾羨慕戰友許廷鏗,「當時我係有眼紅有羨慕,點解人地咁犀利?但自己亦有責任,因為我係門外漢,公司話點就點,直情響屋企等運到,但當時工作好密,無想過後續。」

除了之後《巨聲》二、三幫後浪推前浪影響,劉威煌2010年發表「實力股」言論,被指暗寸羅力威飽受網民圍攻令事業大受影響,其後更被網民冠以周星馳電影反派角色「常威」作花名,令他飽受困擾。談及當年失言,他說:「實力股事件係最先遇到嘅打擊,係公關災難,識我嘅人就會知我無惡意,我同羅力威後尾都係friend嚟㗎。我無諗過撐A變了攻擊B,證明自己當時好幼嫩。」至於被指貌似「常威」鄒兆龍,近年他才不介懷,「嗰陣對我係幾大打擊。俾人叫『常威』好嬲㗎,因為係反派角色,代入咗『衰人』兩個字,好想為自己平反!後來先知好正喎,個個都記得我,同古卓汶比賽都直接叫我『常威』,哈!以前反駁係好傻,嗰陣我真係唔識網絡嘅運作。」

不過,對於另一網民封號「億萬駙馬」,劉威煌指到今天仍介意,他亦沒想過2014年公開與交往7年的太太Sandy結婚後,愛妻會被人起底,「到而家都介意『億萬駙馬』呢個名,叫我『常威』仲好,因為唔係事實呀嘛,介意係因為老婆背景唔係網上所說咁勁,係好困擾我哋兩個,因為事件涉及很多人,包括老婆同我的兩個家庭,如果我食軟飯,亦唔使工作。」節目中,劉威煌感謝妻子由拍拖到結婚至今18年,一直全心全意待他,包容他硬頸性格,當年《巨聲》時代,太太曾反對他辭工入行,原來去年再戰《中年好聲音2》,太太也一度反對,「佢第一時間反對,驚大家都再受打擊,首先有好多舊事畀人重提,其次大家還會不會接受我?參加目的又係乜?我話畀佢知我只係鍾意唱歌啫,身邊好多朋友支持我再試,我叫佢唔使擔心,我唔係想去再紅再做返歌手,隨心去做努力做,唔好諗會帶畀你啲乜。」劉威煌指林夕為他寫《普通人》的歌詞,正正代表他的心聲。

(即時娛樂)

相關字詞﹕劉威煌