佘詩曼、林峯、黃浩然、羅子溢、梁靖琪、陳靜、劉江、余安安、張鳳妮、龔慈恩、程可為、梁諾妍和艾威等，日前出席《家族榮耀之繼承者》慶功宴，林峯為《九龍城寨之圍城》謝票後，帶同「十二少」胡子彤趕到，林峯捧著粉紅色大蛋糕現身，全場大合唱生日歌，令壽星女佘詩曼驚喜萬分，安安姐、張鳳妮、Toby等擁抱送祝福。
劇中阿佘、林峯和黃浩然三角愛情關係，令人看得牙癢癢。最新劇情講到阿佘坐冤獄，她說：「雖然坐監，但有兩位護花使者喺我身邊，其實都幾幸福。」戲中飾演阿佘追求者、富二代「Rio」黃浩然笑說：「我記得，好似一出獄即刻又搵我借錢啦！」
周旋兩位型男之間，觀眾都替阿佘頭痛，黃浩然說：「我老婆都有追劇，佢話梗係揀我，唔通揀阿峯咩？」林峯贊成：「我都係咁揀！」阿佘問：「唔係問你老婆，係問你本人點揀？」他說：「咁梗係揀我啦！」阿峯和議：「我老婆都係咁講！」他們笑指浩然戲中角色對阿佘非常豪爽，取笑他是提款機。浩然說：「不過，如果我係阿佘，我會揀『高浚』（林峯飾），愛情係無原因。」
《繼承者》開播踏入第四周，浩然透露劇情將與阿佘講金又講心，他說：「嚟緊『Rio』終於唔使淨係同『皓兒』講錢，佢將有一場好情深嘅表白，好好睇。」林峯亦透露「高浚」將面臨重大危機，他說：「之後『高浚』都幾慘，將經歷一啲大事，亦牽涉到丘家。其實『高浚』都幾孤獨，好彩嗰段時候『皓兒』有喺身邊陪伴。」
另一邊廂，羅子溢、陳靜（DaDa）和梁靖琪（Toby）自言是劇中「動作擔當」，羅子溢自爆網上新封號「丘家唯一男孫」，令他啼笑皆非，戲中演胞妹的Toby說：「我以為你叫『渣男』！」又說：「我喺劇中好多動作戲，落水、跑沙灘、俾人打，女仔之中我算係俾人打得最多。」
DaDa大讚Toby後空翻跌落海一幕，Toby扁嘴並指住子溢說：「你知唔知有人笑得好開心㗎！我一路游緊水，一路有人哈哈哈哈，有片為證㗎！」子溢忍笑，說：「我驚你有事呀！」
Toby透露其角色隨劇情走向令人心酸，說：「哎呀，好傷心㗎！有幾場戲都好深刻，例如我同嘉良哥（羅嘉良）、我同我阿哥啦！（她指住子溢）佢好衰，呢個丘家唯一男孫，睇完大家會更加憎佢，好衰呀！」
子溢劇中艷福無邊，先後與梁諾妍和王敏奕等靚女有親密場面，他說：「我係愛情動作組，嘻嘻，有啲經驗咁啦！令對手舒服啲，冇乜戒心，可以放鬆，不過我都有俾人打。」有否與老婆楊茜堯一齊睇？他笑說：「呢啲時候梗係走啦！啱啱嗰段時間幫小朋友冲涼，我有畀短片佢睇，佢睇完都『咦～』！」Toby落井下石，說：「係咪冇得入門口？」子溢笑說：「我膝頭哥損晒，仲未好番！」
