林德信Rap出80年代繁華懷舊風 跟鄭嘉嘉勤練舞 (16:29)

文章日期:2024年06月11日

人逢喜事精神爽的林德信(Alex),生活上迎來新階段,在工作方面亦絕不鬆懈,一直熱愛音樂的他,過往大半年亦離不開創作,與近年音樂上緊密合作的歌手鄭嘉嘉,一起創作新歌《Drifting in Hyperspace(超空間)》,Alex負責Rap,鄭嘉嘉唱普通話。2人把歌曲精髓,於MV中表達出來,深紅服飾帶點神秘又懷舊感,黑漆漆的場地,就如以前Disco一樣,一個尋開心又不醉無歸的地方。

Alex說:「呢首歌創作時參考過導演David Lynch作風,所以MV都係超現實、暗黑風格,亦用咗好多懷舊道具布景。80年代嘅香港係好開心,夜生活亦好豐富,好多人都會去跳舞,就好似今次MV以Disco做場景, 服裝又有點復古,就是想向80年代致敬。」

當年夜蒲一族要「落D」,講到「落D」,Alex有沒有問爸爸林子祥,當年去Disco的印象呢? Alex說:「我冇聽過爸爸去Disco,只係見佢收工就返屋企瞓,反而我以前玩音樂,好多時玩到深夜3、4點,會去After Hours Club玩音樂,感覺好正。聽到音樂就想跳舞,所以創作Hyperspace概念,就係想帶畀大家呢種空間感,享受音樂、享受跳舞。 」

鄭嘉嘉以普通話唱《Drifting in Hyperspace(超空間)》,Alex就負責Rap。 嘉嘉說:「我哋覺得普通話會容易表達歌曲嘅意思,外國好多歌都係男仔做Rap,女仔負責唱,只不過大中華市場就比較少。而Hyperspace係想帶大家超越空間,離開地球,離開壓力嘅地方,喺呢個空間就只有音樂,好歡樂。」

至於MV以Disco為場景,嘉嘉表示沒有去過Disco,但對Disco音樂卻不陌生,亦聽過前輩表示當年所用的鍵琴,彈出來的節拍聲好特別,她盼有機會可以彈當年的鍵琴。

Alex表示與嘉嘉要勤力練舞:「嘉嘉跳舞比我好得多,我就真係要苦練,以前拎住結他,以創作歌手形象出現,但Hyperspace要有好多能量,我同嘉嘉需要放低樂器去跳舞,所以要上堂學跳舞,甚至重新學唱歌,唱住歌跳舞同唱彈結他唱歌真係好唔同。」

(即時娛樂)

 

相關字詞﹕林德信 鄭嘉嘉