由梁思浩、黃紫恩（Jojo）及黃耀英主持的TVB Plus節目《直播靈接觸》，昨晚（9日）播出一集主題是「回魂夜」。
思浩分享親身經歷，他說：「婆婆94歲時走咗，知道嗰日係回魂夜，我成屋開晒冷氣閂晒窗，唔知點解10點幾左右，我喺屋企見到好大隻好靚嘅飛蛾伏咗喺牆度，第一時間諗，我閂晒窗應該冇嘢入到嚟，我就諗係咪婆婆返咗嚟，因為我咩都冇準備，所以好緊張，之後打開雪櫃拎晒啲朱古力出嚟，同埋開咗2支香檳。」
思浩再分享關於嫲嫲的神奇事跡，他說時亦不禁落淚：「我嫲嫲係上海人，死咗之後條屍要擺喺屋企3日，掃地婆（即堂官）會教我哋點照顧先人，嫲嫲因為比較老，佢對腳係彎咗，好難擺入棺材，掃地婆叫我哋撳住對腳同埋叫佢個名嗌佢上路，我啲眼淚一路流﹑就一路嗌嫲嫲個名，最後嫲嫲雙腳係慢慢咁樣直番。」
