泳兒（Vincy）將與同門師弟洪助昇（Aiden）、黃明德（Dark）及黎展峯（Andy），參與一年一度的《New Bomb音樂會》演出。是次表演場地是室外，Vincy不擔心熱及曬黑︰「我出名怕凍，所以絕對唔驚熱，而且我曬極都唔黑，加上今次係傍晚開騷，好似話場地一邊唱一邊可以睇到日落，應該好好feel。之前同阿Dark喺澳門都做咗個戶外騷，氣氛好正。今次呢個場地，歌手同觀眾感覺更加close，更加感受到佢哋嘅熱情。」
Vincy笑言屆時會帶定水槍上台跟觀眾「互動」︰「水上樂園嘛，有支水槍喺身好合理﹗」提到演出戶外騷必定被歌迷大叫除衫，她表示會將重任交給3位師弟︰「我冇本錢呀，呢啲梗係交畀啲小鮮肉啦，我都好期待。」不過，洪助昇、黃明德及黎展峯惜肉如金。黃明德說︰「我仲係學生，而且一睇就知我係『賣藝派』啦﹗」一直有健身的黎展峯笑說︰「如果除衫，我驚觀眾會分心，唔專心聽歌。我唔想搶鏡，哈哈﹗」洪助昇就戴定頭盔︰「就算除，都冇話唔打底㗎﹗」
