「唱作歌手」馮允謙（Jay）將於10月9日至11日再踏紅館，舉行第3次個人演唱會「the SOUNDTRACK of my LIFE 馮允謙演唱會2024」，門票今天（6日）公開發售，火速售罄。
今午Jay現身商台接受鄭裕玲（Do姐）節目《口水多過浪花》的直播訪問，工作人員突然在旁邊的房間，隔著玻璃舉牌示意Jay今天公開發售的演唱會門票售罄，Do姐在節目中公告好消息：「哎呀，你個concert sold out啦！恭喜晒你呀！戥你好開心！」Jay開心高呼：「Oh my god！真㗎？多謝！好開心同Do姐你一齊分享呢個moment！」他合十感謝，說：「多謝所有觀眾、多謝我嘅fans，多謝買飛入嚟睇Jay Fung，第3年solo show，我會繼續努力！」
節目結束後，Jay步出直播室，興奮地說：「Oh my god！我好開心，今晚終於有覺好瞓。噚晚瞓得唔係咁好，因為諗緊今次個騷要點呢？啲飛賣成點呢？啲人會唔會再睇Jay Fung嘅騷？所以𠵱家係個肯定，多謝你哋，一日就賣晒啲飛，我會努力，希望good show，大家enjoy，我一定會努力，Thank you！」
