相隔25年，謝霆鋒宣布今年4月於啟德主場館｜舉行兩場《Evolution Nic Live謝霆鋒進化演唱會》，更是亞洲首位登上場館開騷的歌手。開騷消息一出，即現撲飛熱潮，上月信用卡優先訂購，門票隨即被秒殺，一票難求。
由於全城瘋搶，近日疑似「黃牛」於網上放飛，門票被炒至17萬多一張，認真誇張！霆鋒開騷，連阿媽狄波拉都大呻冇飛，英皇集團主席楊受成說：「拉姑都嗌晒救命！」問到楊受成現在是否不夠膽聽電話，驚人致電求飛，楊說：「聽（電話）！點會唔聽？我話你哋登記先，到時如果有我就畀你。」
問到會否加場？楊受成幽默說：「你知佢好有性格㗎，冇人可以叫到佢㗎，佢𠵱家諗緊。」對門票被炒高至6位數，英皇娛樂集團營運總裁霍汶希（Mani）勸大家要理性購票，「大家咁支持霆鋒當然開心，但希望大家理性啲，唔好咁炒貴啲飛，同埋唔好幫襯黃牛。」日前Mani跟老闆楊受成、霆鋒、拉姑跟久未公開露面的四哥謝賢團拜，四哥便裝打扮好精神。
